Archive | Inzibutso

Abarokotse Jenoside yakorewe Abatutsi mu murenge wa Busengo bavuga ko ikibazo cy'umutekano muce cyatangiye kugaragara mu kwibuka ku ncuro ya 22

Tags: ,

Gakenke: Havugwa ubugome bukorerwa Abarokotse Jenoside

Posted on 29 June 2016 by peter

Abarokokeye Jenoside yakorewe Abatutsi mu Murenge wa Busengo mu Karere ka Gakenke bahangayikishijwe bikomeye n’umutekano wabo kuko harimo abifuza kubagirira nabi.

Abarokotse Jenoside yakorewe Abatutsi mu murenge wa Busengo bavuga ko ikibazo cy'umutekano muce cyatangiye kugaragara mu kwibuka ku ncuro ya 22

Abarokotse Jenoside yakorewe Abatutsi mu murenge wa Busengo bavuga ko ikibazo cy’umutekano muce cyatangiye kugaragara mu kwibuka ku ncuro ya 22

Abarokotse Jenoside yakorewe Abatutsi mu murenge wa Busengo babitangaje ubwo hibukwaga abagore n’abana bazize Jenoside yakorewe abatutsi muri Mata 1994 umuhango wabereye ahahoze sous prefecture ya Busengo mu cyahoze ari komine Gatonde kuri uyu wa 28/06/2016.

Bavuga ko mbere nta bibazo bikomeye bijyanye n’umutekano bagiraga ariko ngo ubwo batangiraga kwibuka ku ncuro ya 22 bagiye babona imyitwarire itari myiza ku baturanyi babo bababwiraga amagambo abakomeretsa kugeza n’aho hari uwo bari bagiye kurogera mu mazi.

Mukankusi Virginie wo mu Kagari ka Buteteri, avuga ko kuva kwibuka kunshuro ya 22 byatangira nta mahoro n’umutekano yigeze agira kuko abantu bazaga bakarara bahondagura kumadirisha y’inzu ye kugeza naho banze kunyurwa bagashaka kumurogera mu mazi.

Ati“Byanze kubanyura noneho bakajya baza kuronda ikidomora cy’amazi aho ndi buvome, umuntu witwa Florida kumuvuga ntabwo byantera isoni kugirango nimwumva napfuye muzaze gushyingura umuryango ariko muzi ko ari uko biri. Ubwo yaje kubaza ikidomora cyanjye cy’amazi twe twari twagiye mu nama ariko icyo kidomora yari yashizemo uburozi ntabwo cyari icyanjye cyari icy’umuyobozi w’umudugudu ariko azi ko ari icyanjye tugomba gupfa tugashira”.

Kubera ko Florida yakomeje kubaza nyiri kidomoro yaje kumenya ko atari icya Mukankusi maze yihutira kumena amazi yari yahumanyije, bimaze kumenyekana abajijwe yemera ko yari afite umugambi wo kumara umuryango wa Mukankusi.

Abarokotse Jenoside muri Busengo bavuga ko batarebwa neza n’abatarayirokotse kuko aho banyuze babaryanira inzara, bakabavugiraho amagambo abashinyagurira ku buryo batorohewe n’ubwo bitaragera ku rwego nkurwa Mukankusi.

Ubuyobozi bw’Akarere ndetse n’inzego zishinzwe umutekano buvuga ko ikibazo batari bakizi kuko cyagumye mu nzego z’umudugudu n’utugari ariko bakaba bagiye kugikurikirana kuko ari ikibazo gikomeye kidakwiye kwihanganirwa.

Kuva kwibuka Jenoside yakorewe Abatutsi ku ncuro ya 22 byatangira i Busengo hagaragaye ingengabitekerezo imwe ya Jenoside.

Comments (0)

Abakozi b'akarere bashyize indabo ku mva ziri mu rwibutso rwa Murambi aho bagenzi babo bashyinguye

Tags: ,

Hibutswe 400 bari abakozi ba Perefegitura ya Gikongoro

Posted on 29 June 2016 by peter

Hibutswe abagera kuri 400 bari abakozi b’icyahoze ari perefegitura ya Gikongoro, bishwe muri Jenoside yakorewe Abatutsi muri Mata 1994.

Abakozi b'akarere bashyize indabo ku mva ziri mu rwibutso rwa Murambi aho bagenzi babo bashyinguye

Abakozi b’akarere bashyize indabo ku mva ziri mu rwibutso rwa Murambi aho bagenzi babo bashyinguye

Mu gihe iminsi 100 yo kwibuka Jenoside yakorewe Abatutsi irimo igana ku musozo, ku nshuro yayo ya 22, Kuri uyu wa 28 Kamena 2016, Akarere ka Nyamagabe kibutse abakozi bako bishwe, mu gikorwa cyabanjirijwe n’urugendo no gushyira indabo ku mva mu rwibutso rwa Murambi.

Umuyobozi w’akarere wungirije ushinzwe iterambere ry’ubukundu Jean Lambert Kabayiza, yashishikarije abakozi b’Akarere ka Nyamagabe kwibuka bagenzi babo bambuwe ubuzima ariko banazirikana imirimo myiza bakoraga.

Yagize ati “Twumve yuko abo tuje kwibuka ntabwo twabarushaka imbaraga, ntabwo twabarushaga ibitekerezo, nta n’ubwo twabarushaka ubwenge, rero iyo twafashe uyu mwanya kugira ngo tubibuke, ni ukwibuka ibikorwa byiza bakoraga na serivise bahaga abanyarwanda.”

Yakomeje avuga ko nk’abakozi b’akarere by’umwihariko bakwiye gukora cyane kugira ngo bazibe icyuho abishwe basize kubera ubuzima bambuwe n’abazabasimbura basange hari icyakozwe.

Yagize ati “Turasabwa nk’abakozi gutekereza kubyo dukora, kuri iki cyuho gihari, hari aho tubura aho duhera ugasanga ibyo bari gukora ntabyo, nitwe rero tugomba kuziba icyo cyuho tugakora aho bari gukora tugashyiraho n’akacu n’abadusimbura bakabona ko haricyo twakoze.”

Abakozi b’akarere ka Nyamagabe bakaba barakusanije amafaranga y’U Rwanda agera kuri 13,600,000 agenewe gufasha abarokotse Jenoside yakorewe Abatutsi, Ibuka isaba ko hakwiye kumenyekana uko azakoreshwa mu gukomeza kwita ku bacitse ku icumu. 

Comments (0)

Ngo 27 Kamena ni itariki, idashobora kwibagirana ku Basesero

Posted on 28 June 2016 by peter

Abarokotse Jenoside mu Bisesero bavuga ko ku itariki ya 27 Kamena 1994, ari bwo babonye ko baneshejwe burundu n’ibitero bagabwagaho n’abashakaga kubica.

m_2

Hanashyinguwe mu cyubahiro imibiri 91

Kuri iyi tariki, ni bwo abasirikare b’Abafaransa bageze ahazwi nko mu Bisesero ho mu Karere ka Karongi, aho Abatutsi bahigwaga bari baragize ubutwari bishyira hamwe ngo babashe kwirwanaho mu gihe mu bindi bice by’igihugu jenoside yasaga n’igeze ku musozo.

Ubwo babonaga aba basirikare bera, ngo bibeshye ko baje kubatabara ndetse babereka uburyo bari kwicwa bazira akarengane, ariko ahubwo biba uburyo bwo gutanga amakuru ko hari ahantu hakiri Abatutsi benshi bataricwa, ari bwo ingufu ziturutse impande zose zakusanyijwe zigamije gutsemba abanya Bisesero.

Ibi byagiye bigarukwaho mu buhamya n’amagambo by’abantu batandukanye mu muhango wo kwibuka ku nshuro ya 22 Abatutsi barenga ibihumbi 50 baguye mu Bisesero, kuri uyu wa Mbere tariki ya 27 Kamena 2016, abahuruzwaga gutanga ubufasha mu kwica ngo bakaba barabwirwaga ko ari Inkotanyi zageze Bisesero.

Havugimana Innocent umwe mu barokotse ibi bitero yagize ati :“ Igihe twirwanagaho dukoresheje amabuye, twisanze turi kuraswaho ibisasu bya rutura, interahahamwe, abasirikare n’abapolisi bavuye hose bahurujwe ngo Bisesero Inkotanyi zaciye ibintu, byageze aho tubona ko birangiye.”

Senateri Mukankusi Perrine ari nawe wari umushyitsi mukuru muri uyu muhango yasabye Abasesero guhorana ubutwari bagaragaje muri Jenoside, bakabukoresha mu kwiyubakira igihugu, anagaya abicaga bataragire ubushake bwo gusaba imbabazi abo bahemukiye.

Ati “Wowe wahemutse uribwira iki niba udatera intanbwe ngo usabe imbabazi? Tugomba kugira igihugu cyiza, kandi wabishaka utabishaka kugerwaho.”

Muri uyu muhango kandi hanashyinguwe mu cyubahiro imibiri 91 y’Abatutsi bishwe muri Jenoside yabonetse mu Mirenge ya Bwishyura, Mubuga, Gishyita, Rwankuba, Twumba na Gitesi.

Comments (0)

Urubyiruko rwiyemeje kurwanya abafobya Jenoside

Posted on 27 June 2016 by peter

Urubyiruko rwiga mu ishuri rikuru ryigisha imyuga n’ubumenyingiro IPRC East rwatangije gahunda yo kurwanya abahakana n’abapfobya Jenoside yakorewe Abatutsi rwifashishije imbuga nkoranyambaga.

Urubyiruko rwa AERG rwo muri IPRC East  rwunamiye abazize Jenoside bashyinguwe mu rwibutso rwa Remera

Urubyiruko rwa AERG rwo muri IPRC East  rwunamiye abazize Jenoside bashyinguwe mu rwibutso rwa Remera

Iyi gahunda yatangije n’urubyiruko rw’abanyeshuri barokotse Jenoside yakorewe Abatutsi mu Rwanda mu 1994 biga muri IPRC East rwibumbiye mu muryango AERG .

Nshizirungu Elysée umuhuzabikorwa w’umuryango w’Abanyeshuri barokotse Jenoside (AERG) muri IPRC East avuga ko bagira gahunda ya buri munsi yo gusura imbuga nkoranyambaga no gusuzuma ibyanditsweho, ibigoreka amateka y’u Rwanda bakabinyomoza.

Ati “Ni yo mpamvu   nka AERG n’abanyeshuri muri rusange duhashya ingengabitekerezo ya Jenoside, ku mbuga nkoranyambaga,  ntabwo umunsi ushobora kwira tutagezeho, ari kuri twitter, facebook  n’izindi, ibyo bandika turabinyomoza, tugira na za group za whatsApp”

Akomeza avuga ko nk’uko biri mu nsanganyamatsiko yo kwibuka ku ncuro ya 22, kurwanya ingengabitekerezo ya Jenoside, ngo basanze guhangana n’abayipfobya bifashishije imbuga nkoranyambaga ari uburyo bwiza

Yagize ati“Imbuga nkoranyambaga ni uburyo bwiza bwo kurwanya ingengabitekerezo ya Jenoside kuko n’abapfobya n’abahakana Jenoside usanga ari zo banyuzaho ubutumwa bubi, kuzikoresha rero bifasha kunyomoza ibyo banditse, kuko twe nk’urubyiruko rwize, tuzi gusoma ari icyongereza, igifaransa byose  turabyumva.”

Ngabitsinze Eric wari uhagarariye umuhuzabikorwa wa AERG mu Rwanda, ubwo muri IPRC East hibukwaga abari abanyeshuri ndetse n’abakozi bahakoraga n’abahigaga bazize Jenoside yakorewe Abatutsi mu 1994, na we yagarutse ku gushishikariza urubyiruko gushyira imbaraga mu gukoresha imbuga nkoranyambaga bahangana n’abashaka gupfobya Jenoside yakorewe Abatutsi.

Agira ati “Biradusaba ibikorwa bitoya n’ubundi twirirwa dukora, ni ugukoresha imbuga nkoranyambaga zacu, aho kugira ngo twirirwe kuri WhatsApp tuganira ibidafite agaciro, ahubwo ku munsi wakoresha urukuta rwawe rwa Twitter, ugashyiraho ijambo rimwe gusa rica intege umuntu uhakana Jenoside ndetse n’ibikorwa u Rwanda rumeze kwigezaho.”

Uru rubyiruko rwiga muri IPRC East rushishiskariza n’urundi rubyiruko hirya no hino rufite amahirwe yo gukoresha imbuga nkoranyambaga guhaguruka rukarwanya abapfobya Jenoside bifashishije imbuga nkoranyambaga.

Comments (0)

Tags:

Barasabwa gufatira ingero nziza ku bakozi bazize Jenoside

Posted on 27 June 2016 by peter

Ubuyobozi bw’Akarere ka Ruhango burasaba abantu gufatira ingero nziza z’ibikorwa by’abakozi bishwe bazize Jenoside, kandi bakabifataho ingero nziza.

Hibutswe abari abakozi b'amakomine agize akarere ka Ruhango

Hibutswe abari abakozi b’amakomine agize akarere ka Ruhango

Ibi ni ibyagarutsweho n’umuyobozi w’Akarere ka Ruhango Mbabazi Francois Xavier, mu mpera z’icyumweru dushoje mu muhango wo kwifatanya n’abarokotse jenoside mu kwibuka abahoze ari abakozi b’amakomine yabyaye Akarere ka Ruhango, bishwe muri Jenoside.

Uyu muyobozi akaba yakomeje asaba abakozi guhora bazirikana ibyiza byarangaga abakozi bishwe muri Jenoside kandi bakabafataho ingero nziza.

Yagize ati “Dukwiye kuzirikana ubwitange bwabarangaga mu kazi, tukazirikana ubwuzu bagaragazaga mu kazi, tukazirikna umurava bakoranaga, umurimo unoze wabarangaga, urukundo n’ubusabane mu bo bakoranaga ndetse no hanze y’akazi, ibyo byose tukabifataho ingero nziza”.

Mu butumwa kandi uyu muyobozi yatanze, agaya cyane umutima w’ubunyamaswa waranze abateguye n’abashyize mu bikorwa Jenoside,  ashima ingabo zari iza RPF zabashije guhagarika Jenoside no guha Igihugu umurongo mwiza, ubu kikaba kigana aheza.

Yakomeje ashima Leta yashyizeho gahunda yo kwibuka muri rusange Abatutsi bazize Jenoside, anashima ko hagiyeho uburyo bwo kwibuka mu buryo bwihariye, ari nabwo butuma uyu munsi abakozi babasha kwibuka bagenzi babo bababanjirije mu kazi barimo ubungubu.

Umuyobozi wa Ibuka mu Karere ka Ruhango, Munyanziza Narcisse, yifurije abarokotse gukomera no kugira ubutwari,  kuko ubutwari ari bwo buzatuma bagera ku byo abishwe bifuzaga kugeraho bakabibuzwa n’ubugome ndengakamere bwatumye bagenda imburagihe.

Mu izina ry’imiryango y’abari abakozi b’amakomini bishwe muri Jenoside yakorewe Abatutsi mu 1994, Madamu Mukamasabo Esther, yashimye ko hatekerejwe gushakisha amazina y’abari abakozi b’amakomini bishwe muri Jenoside kugira ngo nabo bajye bibukwa mu buryo bwihariye, ariko asaba ko igikorwa cyo kubashakisha cyakomeza gushyirwamo imbaraga.

Yasabye kandi ko abarokotse Jenoside batishoboye bo mu miryango y’abibutswe uyu munsi n’iy’abazamenyakana nyuma bafashwa kugira ngo imibereho yabo igende irushaho kuba myiza.

Kugeza ubu hamaze kumenyekana abakozi 29 bari ab’amakomini ya Masango, Mukingi, Ntongwe na Tambwe na Kigoma.

Comments (0)

Bamwe mu bacuruzi bakorera mu Karere ka Huye bitabiriye igikorwa cyo kwibuka bagenzi babo bishwe muri Jenoside

Tags: ,

Huye: Jenoside ngo yatumye umujyi udatera imbere

Posted on 24 June 2016 by peter

Abikorera bo mu karere ka Huye bavuga ko jenoside yahitanye benshi mu bahacururizaga ,ikaba ariyo mpamvu yo kudatera imbere kwawo.

Bamwe mu bacuruzi bakorera mu Karere ka Huye bitabiriye igikorwa cyo kwibuka bagenzi babo bishwe muri Jenoside

Bamwe mu bacuruzi bakorera mu Karere ka Huye bitabiriye igikorwa cyo kwibuka bagenzi babo bishwe muri Jenoside

Ubwo hibukwaga abacuruzi ndetse n’abandi bikoreraga mu cyahoze ari Butare, bazize Jenoside yakorewe Abatutsi mu 1994, kuri uyu wa 23 Kamena 2016, abacuruzi bavuze ko uyu mujyi wari wiganjemo abacuruzi benshi kandi bari bafite ishyaka ryo gukora bakawuteza imbere.

Umuyobozi w’urugaga rw’abikorera mu Karere ka Huye Byemayire Lambert avuga ko politiki mbi yaranze igihugu yahezaga ababarirwaga mu batutsi mu mashuri, bityo abenshi bakigira mu bucuruzi.

Ibi ngo byanatumye mu gihe cya Jenoside yakorewe Abatutsi hicwamo abacuruzi benshi, bashoboraga kuzazamura umujyi wa Huye bakoreragamo, ndetse binatuma ubucuruzi busa n’ubupfuye muri uyu mujyi ari nayo mpamvu abenshi mu babonye igishoro gihagije bawimukamo.

Ati”Ubucuruzi muri uyu mujyi wacu busa n’ubwapfuye,kandi impamvu nyamukuru ni icyuho cy’aba bacuruzi twabuze”.

Uyu munsi ubonye igishoro gihagije yigira i Kigali, tukabona uyu mujyi ugenda usubira inyuma kubera ingaruka za Jenoside yadutwaye abacuruzi benshi”.

Ragera Emmanuel wari umucuruzi mu nkengero z’umujyi wa Butare mbere ndetse no mu gihe cya Jenoside ndetse akaza no kuyirokoka n’ubu akaba agicuruza, avuga ko n’ubwo mu bucuruzi batotezwaga ngo babyihanganiraga bakagerageza gushaka imibereho kandi ikaboneka.

Ati”Akenshi ibiraka cyangwa amasoko meza ntibayaduhaga, twariryaga tukimara ndetse akenshi ugasanga ba Rujigo (abasoreshaga)ugasanga baratugendaho,tugaceceka ngo turebe ko bwacya kabiri,ariko kandi imibereho ikaboneka”.

Umunyamabanga Nshingwabikorwa w’Intara y’Amajyepfo Izabiriza Jeanne yasabye abacuruzi bacururiza mu mujyi wa Huye guharanira ko ibyabaye bitangongera, bagashyira hamwe bagaharanira guteza imbere umujyi bakoreramo.

Ati”Nimushyire hamwe mube abahanga b’icyiza,mube abaswa b’ikibi. Kandi n’abagiye ntibazimye bafite abana n’abandi babakomokaho,mureke tube abagabo bo guharanira kwiteza imbere”.

Umubare nyakuri w’abari abacuruzi mu mujyi w’icyahoze ari Butare ndetse n’udusantere two mu nkengero zawo bazize Jenoside nturamenyekana, gusa urugaga rw’abikorera mu Karere ka Huye ruvuga ko ruzakomeza gushakisha amakuru kugirango bamenyekane bose bajye bibukwa.

Comments (0)

Tags:

Abavutse nyuma ya Jenoside barasabwa kuyirwanya

Posted on 20 June 2016 by peter

Abanyeshuri biga ku ishuri ribanza rya Ecole Internationale des parents de Butare barasabwa kwirinda ingengabitekerezo ya Jenoside bagaharanira kubaka u rwanda rushya.

 

Aba bana banasuye urwibutso rwa Ngoma ruri mu murenge wa Ngoma

Aba bana banasuye urwibutso rwa Ngoma ruri mu murenge wa Ngoma

Ibi babisabwe kuri uyu wa gatanu 17 Kamena 2016,ubwo iri shuri  ryibukaga ku nshuro ya 22 jonoside yakorewe abatutsi muri Mata 1994.

N’ubwo aba bana bavutse nyuma ya genocide, bagaragaza ko hari ibyo bazi ku mateka ya jenoside kandi bakavuga ko bazaharanira ko bitazongera kuba birinda inzangano.

Peter,umunyeshuri uvuka ku mubyeyi w’umunyamahanga ndetse n’umunyarwanda,avuga ko icyateye jenoside ari urwangano,bityo akavuga ko bo nk’abana bagomba guharanira gukumira icyabiba inzangano mu bantu,bagaharanira kwiyubakira igihugu.

Ati« Byose byaturutse ku nzangano.Icyo dukwiye kurwanya rero ni inzangano mu bantu,tukumva ko twese turi abanyarwanda kandi dufite inshingano zo kwiyubakira igihugu ».

Umuyobozi w’iri shuri rya Ecole international des parents de Butare Thibault Goues yavuze ko nk’ikigo bifatanya n’abanyarwanda bose mu kwibuka abatutsi bazize jenoside mu mwaka wa 1994, anavuga ko bagerageza kuganira n’ababyeyi,babakangurira kubwiza abana ukuri kubyabaye.

Ati « Uruhare rwacu ni ukwigisha abanyeshuri.naho ku bijyanye no kwibuka,ubutumwa duha abana ni ukubaremamo ikizere,tubatoza kumvira ababayobora,no kubahiriza indangagaciro ubuyobozi bubatoza nk’abenegihugu ».

Nsabimana Jean Pierre uhagarariye umuryango Ibuka mu karere ka Huye ashishikariza ababyeyi kuganiriza abana ku mateka ya jenoside nk’uko yabaye batayagoreka.

Ati « Abana turabaha ubutumwa bwo kongera gutekereza ku mateka y’igihugu cyabo, tukabaha n’inshingano ko bakwiye kurangwa n’urukundo.Naho ababyeyi turabasaba kutagoreka amateka baganirira abana, bakababwiza ukuri ».

Nyuma y’umuhango wo kwibuka,iri shuri ryanasuye umuturage wo mu murenge wa Mukura mu karere ka Huye,warokotse Jenoside utishoboye ndetse baranamuremera

Comments (0)

Tags:

Abatutsi biciwe mu ruganda rw’icyayi rwa Gisakura baributswe

Posted on 20 June 2016 by peter

Abatutsi biciwe mu ruganda rw’icyayi rwa Gisakura muri Jenoside yabakorewe mu Karere ka Nyamasheke bunamiwe n’abaturage bo muri ako karere.

Hunamiwe imibiri 36 ishyunguye mu rwibutso rwa Gisakura

Hunamiwe imibiri 36 ishyunguye mu rwibutso rwa Gisakura

Kuri iki cyumweru tariki ya 19 kamena 2016 ni bwo Abatutsi bazize jenoside bari abakozi,incuti n’abavandimwe bakora mu ruganda rw’icyayi rwa Gisakura bibutswe.

Muri uru ruganda niho Abatutsi benshi bari barahungiye bizera kuharokokera nyamara abenshi batsinzwe mu cyayi,abandi bicirwa mu ishyamba rya Nyungwe,mu gihe abandi burijwe imodoka bakajya kwicirwa mu Kiliziya ya Nyamasheke.

Uwarokokeye muri uru ruganda,Mukarusine Olive,avuga ukuntu baciye mu nzira ikomeye bakabona ababo bicwa nk’inyamaswa bikaba bibi cyane kuko batabawe bitinze kubera abafaransa bari bakambitse muri ako karere.

Yagize ati “Abagore bajyaga ku muhanda bakaririmba ngo HARAKABAHO Abafaransa (vive les francais )bakambara amakoma,ubundi bagatyaza imihoro bakaza kudutema,bakavuga ngo basange abakobwa bakuyemo imyenda yose ngo barebe abatutsikazi byari agahomamunwa”.

Uhagariye ibuka muri aka karere,Bagirishya Jean Marie Vianney,yagaye cyane ukuntu urubyiruko rwize ari rwo rwishoye mu bwicanyi bagatsemba abantu ku buryo bubabaje ashimira ko ubu hari ubuyobozi bwiza asaba urubyiruko gukurikira inyigisho nziza y’abayobozi beza izakiza u Rwanda.

Yagize ati “Urubyiruko rwa hano rwize ni rwo rwashyiraga ku murongo ubwicanyi basenye igihugu cyabo ariko urubyiruko rwacu rukurikire ubuyobozi bwiza dufite twihute mu iterambere”.

Umuyobozi w’uruganda rwa Gisakura,Satendra Kumar Tyalii,yasabye Abanyarwanda kuba umwe bakiyubakira igihugu cyabo nk’ipfundo rizatuma u Rwanda rwubahwa kandi rugatera imbere.

Yagize ati “Nimuba umwe muzatera imbere muzashyira hamwe ni cyo mbifurije ubwo bufatanye buzatuma amahanga abasanga kandi abubahe,nimwerakana ko mushoboye muzagera kure murute na bya bihugu byibwira ko bikomeye”.

Umuyobozi w’Akarere ka Nyamasheke,Kamali Aime Fabien,yibukije abaturage ko Jenoside itazongera kubaho ukundi kubera ubuyobozi bwiza u Rwanda rufite,asaba gukomeza abarokotse no kubihanganisha,asaba buri wese guhora yisuzuma.

Yagize ati “Bavuze ko abantu bahindutse mu kanya gato bakica, ese aho dusinziriye gato abantu ntibakongera guhinduka,twisuzume kuko bigayitse kubona umuntu yica uwo basengana uwo basoranaga icyayi,tujye duhora twisuzuma”.

Muri uyu muhango hunamiwe imibiri y’abatutsi 36 bashyinguye mu rwibutso rwa Gisakura,hakorwa n’urugendo rwo kwibuka ndetse haremerwa abarokotse batatu buri wese ahabwa inka y’inzungu n’uruganda rwa Gisakura.

Comments (0)

Habanje isengesho

Urubyiruko mu guhindura amateka mabi yaranze u Rwanda

Posted on 13 June 2016 by peter

Mu muhango wo kwibuka Jenoside yakorewe Abatutsi ku ncuro ya 22 wateguwe na G.S Nyakarambi i Kirehe kuwa 10 Kamena, abanyeshuri bafashe ingamba zo guhindura amateka mabi yaranze igihugu bubaka ameza.

Habanje isengesho

Habanje isengesho

Ni nyuma y’urugendo bakoze berekeza ku rwibutso rwa Jenoside rwa Nyakarambi ahashyinguwe imibiri hafi ibihumbi 10 y’inzirakarengane zazize Jenoside yakorewe Abatutsi 1994.

Muri uwo muhango abanyeshuri bababajwe n’uburyo abantu batinyutse bakica abandi babaziza ubwoko, biyemeza kubiba urukundo mu bantu barandura ingengabitekerezo ya Jenoside kugira ngo itazongera ukundi.

Uwimana Lenatha wiga mu rwunge rw’amashuri rwa Nyakarambi agira ati“Urubyiruko iyo badusobanuriye Jenoside dusanga igihugu cyarahombye abantu bari kukigirira akamaro, ni yo mpamvu kwibuka ari ngombwa kuko dukuramo isomo rituma turwanya ikibi kugira ngo amateka mabi yaranze igihugu atazongera ukundi”.

Akomeza agira ati“Twe abanyeshuri turaharanira kubaka amateka meza,twirinda amacakubiri ayo ari yo yose ashingiye ku madini, ku isura twubaka Umunyarwanda twese hamwe duhuza ibitekerezo”.

Kayiranga Valens ati“Twe urubyiruko mbere ya Jenoside iyo dushyira hamwe tukirinda ivangura ntabwo Jenoside yari gushoboka, igihugu cyacu cyabuze ingufu zikomeye, ku giti cyanjye ngiye gukorana n’abanyeshuri bagenzi banjye duhindure amateka turwanya ingengabitekerezo ya Jenoside”.

Abanyeshuri basabye buri wese ukirangwa n’ingengabitekerezo ya Jenoside kuyihagarika birinda gusubiza igihugu inyuma kandi baharanira kubaka Ubunyarwanda.

Nsengiyumva Vincent umuyobozi wa Ibuka mu Karere ka Kirehe yashimiye G.S Nyakarambi ku gikorwa cyo kwibuka Jenoside yakorewe Abatutsi mu gufasha abana kumenya neza amateka mabi igihugu cyagize baharanira kuyakosora.

Yabwiye abari bitabiriye uwo muhango uburyo muri Jenoside byageze aho umubyeyi yicaga abana be ngo ntibahuje ubwoko ati“Hari umwarimu twari duturanye, muri Jenoside umuryango we wamugabyeho igitero umusaba kwica umugore we kuko badahuje ubwoko, aramwica yica n’abana be ngo basa na nyina, murumva iyo myumvire y’umuntu twafataga ko ajijutse”.

Yasabye abana kujya bibuka ko hari bagenzi babo bishwe nabi, abasaba guharanira gukora ibikorwa by’ubutwari bahindura amateka mabi yaranze u Rwanda bityo Jenoside ntizasubire ukundi.

Muri uwo muhango abarezi n’abana ba G.S Nyakarambi baremeye abakecuru n’abana batishoboye babaha ibiryamirwa, amatungo n’ibikoresho bitandukanye by’ishuri.

Comments (0)

Bose uko baje gusura urwibutso rwa Jenoside rwa Murambi biyemeje kuba umusemburo mu barwanya jenoside

Abanyabukorikori b’i Musanze biyemeje kuba intumwa zirwanya Jenoside

Posted on 13 June 2016 by peter

Abanyabukorikori bagize Duhaguruke Kora Ltd ikorera muri Musanze biyemeje kuba intumwa zirwanya jenoside nyuma yo gusura urwibutso rwa Jenoside rwa Murambi.

Bose uko baje gusura urwibutso rwa Jenoside rwa Murambi biyemeje kuba umusemburo mu barwanya jenoside

Bose uko baje gusura urwibutso rwa Jenoside rwa Murambi biyemeje kuba umusemburo mu barwanya jenoside

Ibi babitangaje kuri uyu wa gatanu tariki 10 Kamena 2016 mu gusura urwibutso rwa Jenoside rwa Murambi rufatwa nka rumwe mu zigaragaza neza umugambi wari warateguwe kugira ngo harimburwe Abatutsi mu Rwanda.

Munyarubibi Léonard wari uyoboye bagenzi be b’abanyabukorikori uvuga ko ku rwibutso rwa jenoside rwa Murambi bahakuye isomo ry’amateka y’uko jenoside yakorwe abatutsi mu Rwanda yagiye ikorwa mu bice bimwe na bimwe Rwanda.

Yagize ati “Twari abantu babarirwaga amateka ya Jenoside yakorewe abatutsi bari I Murambi ariko ubu tubaye abagabo bo guhamya ibyahabereye ndetse turwanya ko jenoside itazasubira kubaho ukundi”.

Kimwe na bagenzi be basuye urwibutso rwa Jenoside rwa Murambi bavuga ko nibasubira iwabo mu karere ka Musanze bazaba intumwa zifite intego yo kurwanya jenoside n’undi wese wakurura ingengabitekerezo yayo.

Hakizimana Jean Baptiste na we nyuma y’uko asuye urwibutso rwa Jenoside rwa Murambi yavuze ko ababajwe cyane n’abantu bapfobya jenoside yakorewe abatutsi mu Rwanda.

Yagize ati “Ukuri kuri jenoside yakorewe abatutsi mu Rwanda kuragaragazwa na bimwe mu bimenyetso twasuye ku rwibutso rwa Jenoside rwa Murambi, igisigaye ni ukwamagana abo twumva bayipfobya n’abagihembera ingengabitekerezo yayo”.

Iri tsinda ry’abanyabukorikori  abarigize baje bahagararaiye abandi batangaje ko bagiye kumenyekanisha amateka babonye ku rwibutso rwa Jenoside rwa Murambi barwanya n’abagoreka amateka bigiza nkana.

Ku ruhande rw’ubuyobozi bw’Umurenge wa Muhoza bwari buhagarariwe na Akimanzi Felix ari naho abo banyabukorikori baturutse, yasabye uwaba ufite aho ahuriye n’umuntu wese wagize uruhare muri Jenoside kumushishikariza gusaba imbabazi umuryango nyarwanda bitewe n’uko yawuhemukiye.

Mu rwego rwo gukomeza kubika ibimenyetso bya Jenoside yakorewe Abatutsi aha i Murambi hari ibyumba by’amashuli makumyabiri na bine bibitsemo imibiri mu buryo bigezweho ku buryo ishobora kumara igihe kirekire itangiritse.

Comments (0)

Advertise Here