Ubuyobozi bw’Ikigo cy’igihugu gishinzwe iterambere RDB buratangaza ko mu mezi atatu ari imbere igikorwa cyo kuzitira Pariki y’Akagera kizaba kirangiye kikazatwara abarirwa muri miliyari ebyiri z’amafaranga y’u Rwanda.

Icyemezo cyo kuzitira iyi pariki kikaba cyaraje mu rwego rwo gushakira umuti ikibazo cy’inyamaswa cyari kimaze igihe cyarajujubije abaturage. Inyamaswa ziganjemo imbogo, inzovu ndetse n’imvubu zikaba mu bihe by’ibagara n’isarura zatorokaga Pariki y’Akagera zikajya konera abaturage bo mu turere twa Nyagatare, Gatsibo na Karangazi baturiye iyo pariki.

Umukozi w’Ikigo cy’igihugu gishinzwe Iterabere (RDB) ushinzwe kubungabunga amapariki, Ngoga Télésphore, na we yemeza ko ikibazo cy’inyamaswa zonera abaturage cyari kimaze gufata indi ntera. Agira ati “Hari ubwo byarengaga ku kona imyaka zikagira abaturage zambura ubuzima.”

Biteganyijwe ko muri gahunda yo kuzitira Pariki izakorwa ahareshya n’ibirometero 110 ngo bikabna bigomba kuba byarangiye mu mezi atatu ari imbere. Mu rwego rwo kugira ngo barengere ubuzima bw’abaturage ndetse n’imyaka yabo zimwe mu nyamaswa zari zasohotse hanze nk’imbogo, ubuyobozi bwa pariki ngo bukaba bwarazihindiye muri pariki rwagati bukoresheje indege.

nyuma yo kuzitira yo kuzitira Pariki y’Akagera , ku nshuro ya mbere mu Rwanda ngo Ikigo cy’igihugu gishinzwe iterambere RDB , gishobora kwemerera abaturage babishaka korora inyamaswa zo mu gasozi ndetse ngo kikanazana inyamaswa zitari zisanzwe ziboneka mu mapariki y’u Rwanda.

Kuba Pariki y’Akagera ari nto ugeraranyije n’umubare w’inyamaswa ziyibamo ndetse n’ibyo kuzitunga bikaba ari bike ngo byagiye bitera ibibazo mu bihe bishize aho zatorokaga zikajya kwangiza imyaka y’abaturage rimwe na rimwe ngo zikaba zanagira abo zihitana. Ngoga Télélesphore, Umukozi wa RDB ushinzwe amapariki, agira ati “Pariki y’Akagera isigaye ari nto kandi ntibonekamo ibyo inyamaswa zikenera ugereranyije no mu minsi yashize.”

Uyu mukozi wa RDB akomeza avuga ko ari yo mpamvu kuri ubu barimo kuzitira pariki bityo ngo bikaba bizatuma muri iyo pariki hasigaramo inyamaswa bashoboye gutunga kandi ntizongere kwangiriza abaturage.

Ngoga avuga ko mu gihe pariki izaba imaze kuzitirwa Atari ko inyamaswa zose zizayigumamo dore ko n’ubu Atari ko zose zari zikiyirimo. Ngo hari izabaga hanze ya pariki kandi itegeko ritemerera abaturage korora no gukura amafaranga ku nyamaswa zo mu gasozi.

Nyuma yo kuzitira Pariki y’Akagera abaturage na bo ngo bakaba bashobora kuzahabwa uburenganzira bwo korora zimwe mu nyamaswa zagaragaraga muri iyo pariki. Ngoga agira ati “Niba umuntu ashobora kuza kureba impala akabitangira amafaranga kuki umuturage atabigira muri pariki ye bitarinze gusangwa muri pariki y’igihugu. Ahandi umuntu usanga afite pariki irimo amasha, imbogo, ingona kandi biri mu bibaha amafaranga menshi.”

Uretse kuba abaturage bazahabwa uburenganzira bwo korora inyamaswa zo mu gasozi ku busanzwe zagengwaga na Leta gusa, ariko ngo hari n’amoko mashya y’inyamaswa zitari zisanzwe muri pariki z’u Rwanda azazanywa. Muri zo bakaba bavuga intare, inkura ndetse n’inyimba.

Kugira ngo abaturage bemerwe korora inyamaswa zo mu gasozi kandi bazikureho amafaranga aturutse mu kuzisura ariko, Ikigo cy’igihugu cy’iterambere RDB kivuga ko abaturage bagomba kubanza kubyemera ndetse na Leta igashyiraho amategeko agena ubwo bworozi bushya mu baturage. Aha ngo hakaba haba hanakenewe gutegenya uwakwirengera ingaruka inyamaswa ziramutse zoneye abaturage cyangwa zikagira abo zihutaza.

Inyamaswa za Parike y’Akagera ziri hanze ya Parike zose zigomba kuzaba zinjijwe muri iyo Parike imbere bitarenze tariki 03/08/2012 nk’uko bivugwa n’abanyamabanga nshingwabikorwa b’imirenge y’akarere ka Kayonza ihana imbibe n’iyo Parike.

Inyamaswa za Parike y’Akagera zari zisanzwe zisohoka muri Parike zikajya mu baturage, zikabonera, ndetse rimwe na rimwe zikabahutaza, bamwe bakaba baranahaburiye ubuzima. Kuva mu ntangiriro z’ukwezi gushize kwa karindwi iki kibazo cyari cyafashe indi ntera ubwo imirimo yo kuzitira iyo parike yatangiraga.

Inyamaswa zagiye zisohoka muri Parike zagaruka zikabura aho zinjirira kuberako aho zasohokeye habaga hamaze kuzitirwa, bituma zinjira mu baturage ari nyinshi, cyane cyane mu mirenge ya Murundi na Mwili.

Hari imbogo zimaze iminsi ziba mu gishanga cya Kageyo mu murenge wa Mwili na zo zari zasohotse muri ubwo buryo zasubirayo zikabura aho zinjirira, na zo zikaba zizinjizwa muri Parike tariki 03/08/2012 kuko Parike ngo yamaze kuzitirwa bagasiga irembo rimwe rya Parike.

Cyakora ikiyaga cya Rwakigeri cyo nticyazitiwe kandi na cyo kibamo imvubu zikunda kujya mu baturage, kikaba ari na kimwe mu bice bya Parike. Ubuyobozi bw’iyo Parike bwatangaje ko hafashwe ingamba zo gucukura umuferege ku nkengero z’icyo kiyaga uzaba ureshya n’ibirometero 14, ukazajya ubera imbogamizi imvubu ziva muri icyo kiyaga zishaka kujya mu baturage.

Abatuye mu mirenge ihana imbibe na parike y’Akagera, bavuga ko urwo ruzitiro rushobora kuzaba igisubizo kuri bo, kuko ngo bari basanzwe bahinga bazi neza ko nibura kimwe cya kabiri cy’umusaruro beza uba ari uw’inyamaswa za Parike y’Akagera.

Urwibutso rwa Murambi.

Abakozi ba gereza ya Mpanga batangaje ko kuba basuye urwibutso rwa Jenoside rwa Murambi, bizatuma barushaho gukorana ubushishozi mu kazi nyuma yo kwibonera ibimenyetso bya Jenoside no gusobanurirwa amateka yayo.

Ubwo basuraga uru rwibutso ruherereye mu karere ka Nyamagabe, abakozi ba gereza ya Mpanga basobanuriwe  amateka ya mbere na nyuma Jenoside muri rusange ndetse n’amateka yaranze agace kahoze ari Perefegitura ya Gikongoro by’umwihariko.

Aba bakozi babashije kandi no kwibonera ibimenyetso bya Jenoside yakorewe Abatutsi by’umwihariko abari bahungiye mu mazu y’ikigo cy’ishuri cyari kikiri kubakwa ku musozi wa Murambi ari nawo wubatseho uru rwibutso.

Bisengimana Eugene,umuyobozi w’agateganyo  wa gereza ya Mpanga yatangaje ko kuba aba bakozi ba gereza basuye uru rwibutso bifite icyo bibasigiye kuko harimo n’abari bakiri bato igihe Jenoside yakorwaga.

Yagize ati “ aba basore n’inkumi wabonye bose muri icyo gihe cya Jenoside bari abana batoya,ugasanga rero basa nk’aho bigereye ku muzi w’inkuru kubera ko ibimenyetso byasigasiwe n’ubuyobozi bigaragaza ukuri aba bana batari bafite aho bari bari ku magereza.”

Imibare itangwa n’abakozi b’uru rwibutso igaragaza ko kuri uyu musozi wa Murambi hiciwe inzirakarengane z’Abatutsi zigera ku bihumbi 50 zimwe muri zo zikaba zishyinguye muri uru rwibutso.

Guverineri w’intara y’amajyaruguru atangaza ko kuba iyo ntara yaraje imbere mu kugabanya ubukene mu Rwanda ari ukubera ibintu bitandukanye birimo n’ubukerarugendo bukorerwa muri parike y’ibirunga.

Mu muhango wo “Kwita Izina” abana b’ingagi wabereye mu karere ka Musanze tariki ya 16/06/2012, Guverineri Bosenibamwe Aimé yavuze ko Intara y’amajyaruguru iri ku isonga mu kurwanya ubukene naho akarere ka Musanze karimo parike y’ibirunga kakaza ku mwanya wa gatatu mu Rwanda mu kurwanya ubukene.

Kuba ibyo byaragezweho ni uko abaturage baturiye iyo parike bajyaga bajya kuyonona bahigamo Ingagi n’ibindi binyabuzima biyirimo, bishyize hamwe muri Koperative SACOLA (Sabyinyo Community Livelihoods Association) mu rwego rwo kubungabunga iyo parike nk’uko Guverineri Bosenibamwe abitangaza.

Akomeza avuga ko kuri ubu abibumbiye muri Koperative SACOLA bamaze kubona agaciro k’iyo parike kuko ibaha amafaranga menshi bakaba bamaze kwiteza imbere. Abo baturage bamaze kwiyubakira inzu y’ubucuruzi. Iyo kopertive kandi inafasha n’abandi baturage batayirimo mu buryo butandukanye nk’uko abisobanura.

Guverineri Bosenibamwe yakomeje asaba abaturage baturiye parike y’ibirunga gukomeza kuyifata neza kuko ibafitiye akamaro gakomeye. Aho ujishe igisabo ntuhatera ibuye nk’uko yakomeje abibasaba.

John Gara umuyobozi mukuru w’Ikigo cy’Igihugu cy’Iterambere (RDB) atangaza ko kuri ubu ubukerarugendo bwateye imbere muri rusange mu Rwanda kubera uburyo abaturiye parike cyane cyane iy’ibirunga bayifashe neza.

Mu mwaka wa 2011 abakerarugendo baje mu Rwanda barenga ibihumbi 900. Bakaba barinjije mu Rwanda amadorari y’amanyamerika agera kuri miliyoni 252 (agera kuri 151.200.000.000 mu mafaranga yo mu Rwanda).

Abaturiye parike bagenerwa 5% by’amadovize yose aba yinjiye mu Rwanda nk’uko umuyobozi mukuru w’Ikigo cy’Igihugu cy’Iterambere (RDB) abitangaza.

Ubuyobozi bwa Pariki y’Igihugu ya Nyungwe bwasabye abayituriye kwirinda inkongi z’umuriro cyane cyane  muri iki gihe cy’impeshyi kuko zishobora kwangiza iyi pariki.

Mu nama yabaye kuri uyu wa 7/6/2012 ku Cyitabi ahari icyicaro cy’iyi pariki,  abayobozi b’iyi pariki basabye abayobozi b’inzego z’ibanze mu turere dukikije iyi pariki gukora ibishoboka byose bakarinda iyi pariki y’igihugu.

Abayobozi ba pariki ya Nyungwe batangaje kandi ko inkongi z’umuriro zari zisanzwe zibasira iyi pariki zagabanutse muri rusange ariko abayobozi batagomba kwirara cyane cyane muri iki gihe cy’impeshyi kuko ari igihe kibi ku bijyanye n’umuriro aho usanga ibyatsi byumye bigatuma umuriro ukwirakwira vuba ukangiza ahantu hanini.

Abitabiriye inama biyemeje kurwanya inkongi.

Imibare yakozwe ku nkongi zibasira iyi pariki igaragaza ko mu mwaka ushize wa 2011 hahiye hegitari  imwe  mu gihe nyamara mu mwaka wa 2010 hari hahiye hegitari zisaga 653.

Rugerinyange Louis,umuyobozi wa Pariki y’igihugu ya Nyungwe yagize ati “Igihe cy’impeshyi ni igihe kibi aho usanga abantu bahangayitse kubera inkongi z’umuriro zishobora kwibasira Pariki ari nayo mpamvu twahuriye aha kugira ngo dufate ingamba.”

Uretse kurinda iyi pariki inkongi y’umuriro kandi, abari bitabiriye iyi nama bafashe ingamba zo kurinda iyi pariki ibikorwa byose byayangiza harimo gutemamo ibiti,gucukuramo amabuye y’agaciro…

Ishyamba rya Pariki ya Nyungwe ni rimwe mu mashyamba ya kimeza amaze imyaka myinshi muri Afurika rikaba rizwiho kubamo amoko menshi y’inyoni. Iyi pariki  ifite ubuso bungana na km² 1019.

Tariki 18 Gicurasi buri mwaka ibihugu byo mu isi byizihiza umunsi mpuzamahanga w’ingoro z’umurage ku rwego rw’igihugu uwo muhango wizihirijwe i Rwesero ahubatswe ingoro y’ubuhanzi n’ubugeni mu karere ka Nyanza.

Minisitiri Mitali akata umugozi wo gutaha kumugaragaro inzu y’ubugeni n’ubuhanzi bushingiye ku mafoto

Ibirori by’uyu munsi byahuriranye n’igikorwa cyo gufungura ku mugaragaro ubuhanzi bushingiye ku mafoto cyakozwe na Minisitiri Protais Mitali ufite umuco mu nshingano ze.

Minisitiri Mitali ageza ijambo ku bitabiriye ibirori by’ umunsi mpuzamahanga w’ingoro z’umurage

Nk’uko Minisitiri Ptotais Mitali wari umushyitsi mukuru yabisobanuye ubuhanzi bushingiye ku mafoto ni ikintu gishya mu gihugu ariko buzarushaho guhesha igihugu isura nzira igaragaza amateka n’umuco by’u Rwanda rwo hambere ndetse n’ibihe by’iterambere rurimo.

Ashingiye mu mafoto yamuritswe n’ibyamamare muri uwo muhango yavuze ko ubuhanzi bushingiye ku mafoto ari kimwe mu bintu byakorwa kandi bigakurura bamukerarugendo banyuranye maze igihugu kikabibonamo amadovize atubutse.

Aha basobanurirwaga n’iyo mpunguke akamaro ku buhanzi bushingiye ku mafoto

Mu ngoro y’ubuhanzi n’ubugeni iri i Rwesero mu karere ka Nyanza hamuritswemo amafoto agaragaza amateka ya Jenoside yakorewe abatutsi muRwandahifashishijwe uburyo bw’amafoto ku nkuta.

SebukangagaJean Baptisteumunyarwanda w’inzobere mu kugaragaza amateka yifashishije uburyo bw’ifoto avuga ko ubwayo yivugira.

Akoresheje ubwo bunararibonye bwe yerekanye uko umuryango nyarwanda ubanye neza nyuma ya jenoside akoresheje amafoto. Usibye uyu munyarwanda hari n’ibindi byamamare byagaragaje uko amafoto yagaragaza amateka nta bundi buryo bundi bwifashishijwe.

Iri torero ribyina imbyino nyarwanda ryashimishije benshi

Muri ibyo byamamare harimo Umukabwe w’imyaka 80 witwa Kaddu Wasswa ukomoka mu gihugu cyaUgandaakoresheje amafoto yerekanye amwe mu mateka y’ubuzima bwe undi ni  Pieter Hugo ukomoka muri Afurika y’epfo ugaragaragaza amateka ya jenoside yo muRwandaakoresheje  amafoto.

Umuliisa Alphonse, umuyobozi w’ingoro z’umurage w’u Rwanda avugana n’abanyamakuru yavuze ko ubuhanzi bushingiye ku mafoto ari ubuhanzi bugomba kwitabwaho mu Rwanda kuko bufite uruhare runini mu kumenyekanisha amateka n’umuco byaranga igihugu.

Muri icyo kiganiro yahamagariye urubyiruko kwitabira ubwo buryo bw’ubuhanzi bushingiye ku mafoto.

MuRwandaumunsi mpuzamahanga w’ingoro z’umurage waranzwe ahanini n’igikorwa cyo kumurika ubuhanzi bushingiye ku mafoto agaragaza amateka y’umuntu ku giti cye cyangwa igihugu muri rusange hagamijwe kubimenyekanisha mu ruhando mpuzamahanga.

Mu nama yahuje abayobozi b’umuryango uhuza ibihugu bituriye parike z’ibirunga, U Rwanda, Uganda na Repubulika Iharanira Demokarasi ya Congo (GVTC) batangaza ko kuba hakiri abaturage batarabasha kwegerezwa amazi meza, bigira ingaruka ku mutungo kamere w’amaparike.

Ibi bikaba bitangazwa na bamwe mu bayobozi bashinzwe amaparike bo mu bihugu by’u Rwanda, Uganda na Repubulika Iharanira Demokarasi ya Congo.

Usanga mu bihugu bikiri mu nzira y’amajyambere, bigora abaturage kubona amazi meza hafi yabo. Ibi bigatuma bashaka ku buryo bwa gakondo amazi y’amasoko cyangwa y’ibishanga. Abashinzwe kubungabunga ibidukikije bo bakabona ko ibi ari ibiteza ibibazo kuri ayo masoko cyane cyane abajya kuvoma mu maparike.

Therese Musabe, Umuyobozi wungirije wa GVTC avuga ko kuba hari abaturage batarabona amazi meza hafi yabo ngo bituma mu gihe bagiye kuyavoma mu maparike bituma bangiza byinshi birimo amasoko y’amazi, ibimera byo muri parike n’ibindi.

Avuga kandi ko hari bamwe bitwaza ko bagiye kuvoma bityo bakaboneraho kuba bashimuta zimwe mu nyamanswa cyangwa bakaba banazica.

Musabe avuga ko bamaze gufasha abaturage batari bake kubona amazi meza hafi yabo kugirango birinde gusubira muri parike.

Agira ati : “usanga hari benshi tumaze kwegereza amazi meza ndetse hari n’abo twagiye gushyirira ibigega bifata amazi y’imvura kuburyo twizera ko hari icyo bigiye gukemura kigaragara”.

Mark Mwine umwe mu bayobozi ushinzwe amaparike mu gihugu cya Uganda, avuga ko magingo aya bahangayikishijwe n’uko ibikorwa remezo abaturage begerejwe birimo n’amazi meza kuri ubu ko  ngo bari kubifata nabi ahatari hake.

Ati: “usanga nk’aho twashyize amariba rusange aha muri Uganda abaturage bayangiza kuburyo kuramba kwabyo bigoye, hari n’ibigega twashyize ku mashuri kugirango umwana ujye atahana amazi avuye ku ishuri kugirango babone n’umwana wo gusubira mu masomo ariko icyagaragaye ko ni uko ibigega byose babyangije nta mazi bigifata”.

Mwine avuga ko muri iki gihugu bamaze kuabakira ubwoko bw’abatwa usanga buturiye amaparike kuko nabo bagiraga uruhare rwo kwangiza amashyamba, bakaba barahaye amazu ndetse buri nzu ikaba ifite ikigega gifata amazi.

Umushinga GVTC (Greater Virunga Transboundary Collaboration) ufatanije n’ibigo by’ibihugu bifite mu nshingano zabyo ubukerarugendo n’amaparike, RDB mu Rwanda, UWA muri Uganda ndetse na ICCN ku ruhande rwa Congo Kinshasa wahisemo kwegereza abaturage baturiye amaparike ibikorwa by’iterambere kugirango batazongera guhirahira kwangiza aya maparike.

Abayobozi b’aya maparike ni ukuvuga parike y’ibirunga ku mpande zose z’ibihugu batangaza ko ba rushimusi bashimutaga inyamanswa zo muri aya maparike usanga ari abaturage babaga bashaka icyababeshaho kubw’ubukene babayemo ariko magingo aya ngo hari aho bitangiye kugaragara ko ubushimusi mu maparike bumaze kugira ubucuruzi bukomeye.

Aha akaba ngo ariyo mpamvu ibihugu byose byashyize hamwe kugirango barwanye buri wese wangiza parike.
Umuyobozi wa parike y’Ibirunnga ku ruhande rw’u Rwanda, Prosper Uwingeri avuga ko batangiye gufasha abaturiye amaparike kwivana mu bukene binyujijwe mu mutungo winjizwa n’iyi parike.

Avuga ko abari abashimusi muri iyi parike babumbiwe mu mashyirahamwe atandukanye akora ibikorwa birimo ubuvumvu bwa kijyambere kuburyo babasha no kwitunganyiriza ubu buki bukajyanwa ku isoko. Abandi bakaba bari mu mashyirahamwe y’ubukorikori.

Ibi ngo byatumye abajyaga gufakura muri parike babihagarika, ndetse n’abajyaga guca imigano iribwa n’ingagi nabo bahagarara kuko ngo magingo aya babashije kwitere imigano yabo. Iyi migano bateye ikaba ibafasha kwirinda isuri yari yarabajigirije ndetse bakanakuramo iyo bakeneye gukoresha batangije parike.

Ku ruhande rw’ibindi bihugu nk’Uganda, Mark Mwine avuga ko bamaze kubona ingaruka nziza nyuma yo gufasha abaturiye parike zo muri iki gihugu kuko ngo kugeza ubu abaturage aribo bagira uruhare rukomeye mu kurinda izi parike.

Aba baturage ngo bakaba baranigishijwe akamaro ko kurinda ibidukikije kuburyo ngo ibyo bakora babikora babishaka kandi banabikunze.

Bagiye ku rufunzo ahaguye abantu benshi

Abarokokeye mu rufunzo rwo mu murenge wa Ntarama mu karere ka Bugesera barasaba ko hakubakwa urwibutso rugaragaza amateka y’abiciwe muri urwo rufunzo.

Ibyo  babivuze ubwo abatuye   mu mirenge ya Ntarama na Nyamata mu karere ka Bugesera hamwe n’inshuti zabo zituye ahandi, bakoraga urugendo rwo kwibuka abazize Jenoside yakorewe Abatutsi muri Mata 1994, biciwe mu rufunzo rwo mu murenge wa Ntarama.

Mu gihe cya Jenoside yakorewe Abatutsi muri Mata 1994, ababashije guhungira mu rufunzo rukikije iyo migezi, aho bitaga kuri CND, bamaze igihe kirekire bahigwa bukware, bagabwaho ibitero buri munsi n’interahamwe n’abasirikare b’ingoma y’abatabazi. Iyo nzira y’umusaraba Abatutsi banyuzemo ngo ni yo yatumye hakorwa urugendo ruva ku rwibutso rwa Ntarama mu kagari ka

Cyugaro berekeza kuri urwo rufunzo,  nk’uko byatangajwe na Bizimungu Jean Pierre umwe mu baharokokeye.

ati “ Muri uru rufunzo interahamwe zadusangagamo zigatemagura abantu.  Ni ubwo buryo nanjye natemwemo, nyuma nza gusindagizwa n’abarokokeye muri uru rufunzo, tuza kurokorwa twese n’ingabo zari iza FPR – Inkotanyi”.

Cyakora ngo hari ababashije kugaragaza ubutwari birwanaho kandi barwana kuri bagenzi babo nk’uko uwitwa Habarugira Alexis yabitanzemo ubuhamya. Habarugira, ngo yabashije kubohoza imbunda yari ifitwe n’umusirikare wa Leta y’abatabazi abahigwaga bamaze kumurasa umwambi akagwa aho, akomeza kuyifashisha kugeza ubwo ingabo zari iza FPR-Inkotanyi zibarokoreye.

Umuyobozi w’akarere ka Bugesera Rwagaju Louis avuga ko biri no mu byifuzo bya bose, ngo kuri urwo rufunzo hakwiye kubakwa urwibutso rugaragaza ibyahabereye n’amazina y’abahaguye, dore ko bigoye kuba imibiri yabo yaboneka ngo ishyingurwe mu cyubahiro ahandi.

“uwo mushinga wo kubaka urwibutso ugiye gusuzumwa bigakorwa ku buryo bwihuse, ahubwo ndasaba abazi amazina y’abahaguye gutangira kuyandika ngo batazibagirana”.

Ntarama ni umwe mu mirenge igize akarere ka Bugesera, ukikijwe n’Akanyaru ndetse n’Akagera, imwe mu migezi minini itoroshye kuyambuka cyane cyane mu gihe yuzuye.